Naglabas ng
isang kautusan si Gov. Presbitero J. Velasco, Jr. para maiwasan ang isang
posibleng dengue emergency sa lalawigan ng Marinduque. Layunin nito ang
pag-iwas, pagkontrol at paggamot sa sakit na ito na dala ng kagat ng dengue
mosquito.
Kamakailan
ayon sa DOH ang dengue fever ang nangungunang karamdaman sa MIMAROPA at ito ay
idineklara na ng Kagawaran ng Kalusugan sa kasalukuyan bilang isang 'National Health Emergency'.
Naiulat ng
DOH na mula noong Enero 2019 nagkaroon na ng higit sa 100,000 na kaso sa buong
bansa. Ito ay 85% na pagtaas ng denge sa parehong panahon noong nakaraang taon.
Ang Executive Order No.025-2019 ng gobernador ay nag-aatas sa lahat ng mga tanggapan, kagawaran, ahensya at yunit ng pamahalaan na "ipatupad ang lahat ng kinakailangang mga hakbang sa pag-iwas at pagkontrol upang mapawi ang mga epekto ng Dengue sa ating minamahal na lalawigan".
 |
| Gov. Presby Velasco |
Ang mga magpapatupad sa lahat ng hakbangin para sa pag-iwas at pag-control ng
dengue ay ang Department of Health Marinduque, Provincial Health Office, Dr.
Damian Reyes Provincial Hospital, Santa Cruz District Hospital, Torrijos
District Hospital, lahat ng mga lokal na punong ehekutibo ng Marinduque LGUs,
lahat ng opisyales ng mga barangay, mga barangay health workers, lahat ng mga
may kapasidad na mga pribadong klinikang pangkalusugan at ang Department of
Education Marinduque.
Ang mga kinauukulan ay inatasan din na sumunod sa kasalukuyang mga alituntunin tungkol sa dengue na inilalabas ng DOH. Kabilang sa mga ito ang pagtukoy sa lahat ng posibleng mga lugar na pinamumugaran ng dengue mosquito, at upang magsagawa ng kinakailangang paglilinis sa mga barangay.
Iniutos ni Gov. Velasco sa lahat ng mga ospital sa lalawigan na mag stand-by at maging alerto sa mga direktiba ng DOH, kasabay ng paggabay sa mga tao tungkol sa tamang aksyon na dapat isagawa kapag nakakaranas ng mga sintomas ng nasabing sakit.
