KULTURANG MARINDUQUE TULOY ANG PAGYABONG

Ipinaabot ni Atty. Lord Allan Velasco, provincial administrator at chairman ng Provincial Tourism Council na patuloy magsasagawa ang Pamahalaang Panlalawigan ng Marinduque ng mga hakbangin patungo sa pagyabong ng mga kagalingang pangkultura katulad ng isinagawang "Hapit-Himigan" choral competition sa Boac noong nakaraang Biyernes.

Sa kanyang talumpati sa nasabing okasyon, idiniin ni Velasco na tungkulin ng mga mamamayan na sumali o makisangkot sa pagbubuo at pagsusuri sa mga gawaing may kinalaman sa pagsulong ng ating sariling kultura, tradisyon at mga likha. Higit aniya itong binibigyan ng kahalagahan sa kasalukuyang panahon.

Buhay, aniya ang kultura sapagkat ito'y salamin ng mga paniniwala, kabutihang asal at mga panaginip, at isa itong lakas na kaagapay tungo sa pag-unlad ng lipunang tulad ng sa Marinduque. Binanggit ni Velasco na ang pagbibigay ng pagtutok sa kulturang Marinduqueno bilang bahagi ng pangkultura at pangturismong tulak ay magkakasama nang isinasagawa ng kapitolyo kaagapay ang mga pamahalaang bayan.

Binanggit din ni Velasco na ang mga isinagawang pagdiriwang tulad ng “Labanan sa Pulang Lupa”, o, ang pagbibigay ng panibagong sigla sa “Moriones Festival” at gayundin sa ibat-ibang municipal festivals mula sa anim na bayan na, na aniya, ay matutunghayan sa selebrasyon ng “Araw ng Marinduque”, ang pagsasaentablado ng ating mga awit, sayaw at mga kuwento sa pamamagitan ng “Viva Marinduque” project ay bahagi ng simulaing ito.

Ang pagbibigay aniya ng prayoridad at pagkilala sa lalawigan ng Marinduque ng Pambansang Komisyon para sa Kultura at mga Sining (National Commission for Culture and the Arts), para maisagawa ang ibat-ibang proyekto para isulong at mapalaganap nang ganap ang kultura at mga katutubong sining, ay isang matibay na indikasyon ng pag-usad ng lalawigan sa larangang ito.

Ang “HAPIT-HIMIGAN” ay hinirang ni Velasco bilang isang pagbubunyi sa pulong-lalawigan ng Marinduque sa pamamagitan ng awitin at nawa niya ay manatili ang ganitong gawain at "tuluyang makita ang kaganapan ng Kulturang Marinduque sa ating panahon!"

Itinampok sa choral competition bilang contest piece ang "Marinduque Akin Ka", titik at musika ni Eli Obligacion at inareglo para sa koro ni Norma Soldevilla. Sinalihan ito ng iba't-ibang choral groups mula sa bayan-bayan tulad ng Gasan IFI Vocal Ensemble ng Parish of St. Joseph, Reunited Choir of Boac North District, Live Echoes Choir ng St. Mary's College of Marinduque, Municipality of Mogpog Chorale at TORMEA Choir ng Torrijos. Nangasiwa sa competition si Gng. Fe Corazon Recalde ng ECCD. Naging mga hurado sina Gng. Norma Soldevilla ng Marinduque Midwest College, Dr. Roberto Montellano, Anacleto Mendoza, Dindo Asuncion at Eli Obligacion.