 |
| Ang mahiwagang tuktok na bahagi ng Mt. Malindig (Lo-Huang), na tinaguriang Makulilis Peak & Rockies. Precolonial era pa lamang ay naisulat na ito. Ming dynasty period. |
Sa Mao-li-wu (Marinduque) ay may naisulat nung unang panahon
tungkol sa pangangalakal ng mga taong Tsina sa ating panig ng mundo. Panahon
ito ng Yong-le Emperor ng Ming dynasty.
May tinagurian silang isang “bantog na tanawin”. Ito raw ang
Bundok Lo-Huang at sa tuktok daw nito ay may puting bato.
Sa Marinduque, ating magandang islang-lalawigan, ay iisa lamang ang maaaring pinupuntirya
ng banyagang manunulat at ito ay ang Bundok Malindig. Lalo na at mayroon naman sa isang
tuktok nito na ‘puting bato’ na nakabibighani kapag makita mo ng malapitan at maglakbay ka sa bahagi nito na sakop ng Torrijos.
Kung mahiligin ka namang maghalukay sa mga lumang paniniwala
ng mga katutubong Marinduqueno, mga iningatang paniniwalang namana nilang nakatira malapit
sa bundok ay maaaring maibahagi sa iyo ito. Ang kuwentong lihim tungkol sa isang lagusan doon papunta sa
daigdig ng kababalaghan.
Ang kanilang paniniwala ay doon sa puting bato, Makulilis
Peak (ang bansag dito sa ating panahon), nagsisimula ang isang mahiwagang lagusan. Sa kaisipan ng mga may
ganoong paniniwala at kayang ipagtanggol ito, ay doon mismo sila nagtutungo para makasalamuha ang mga
taong nakatira sa kabilang daigdig na iyon. Daigdig ng mga ginintuang palasyo, ginintuang caruaje, mga dwende, engkanto, engkantada, kasiyahan at kakaibang kapangyarihan.
Subukin mo kaya namang akyatin at makihalubilo sa kanila?
Mga larawan ng Makulilis Peak & Rockies sa bahagi ng
Dampulan. Courtesy of Morion Mountaineers Sta. Cruz Marinduque.
